又到聖誕

妹妹: 又到聖誕! 又到聖誕! .......
我    : 心情咁靚學人唱聖誕歌!
妹妹: 我知就快聖誕, 唱下歌應下節呀!
我    : 我都心思思想買聖誕樹呀!
妹妹: 仲有其他嘢要買架!
我    : 係喎! 仲要買聖誕禮物喎!
妹妹: 好嘢! 今年有份收聖誕禮物!
我    : 吓! 我準備買俾契女唔係妳喎!

轉下眼話咁快又到聖誕啦! 大家會點慶祝呀? 聖誕之後又過新年, 早兩日要契女媽幫手換新銀紙, 佢話駛唔駛咁快準備, 我話仲有一個多月就係, 換得來都差唔多呢!

最近唔知點解好鐘意食栗米, 特別係糯米栗, 煙煙unun咁, 超甜栗好似浸過糖水咁真係好好食.

上星期放假唔想煮飯又好想食煱貼, 整咁多分兩日食真係正呀!

同事去沙巴旅行, 買盒榴槤蛋榚卷同茶包俾我做手信, 蛋卷真係好好味呀!

契女爸爸好客氣, 請我同老公仲有呀妹食蛇宴, 原本呀大都有份, 不過咁啱佢要北上, 所以冇得食. 最鐘意食蛇丸同蛇羹呀!

 契女話好想整曲奇, 拿拿聲買材料開工. 開工前先飲杯藍莓益力多沙冰, 唔只顏色靚味道都very good架! 由下午3點開工至6點半收工, 一出爐契女忍唔住食好多塊, 契爺都笑佢咁心急, 話曲奇要攤凍先脆, 但佢都唔理係咁食, 最後好開心咁拎兩包返屋企請家人食!

呢餐冇煮飯, 用花卷做主糧都不知幾好味呀!

蛇宴當晚又食又拎, 今晚翻熱羊腩同糯米飯, 再另加西洋菜湯係咪都好唔錯呢!

是日飯後甜品就係姜汁撞奶!

昨晚既宵夜就係大大粒雲吞加炒什菜.

今日放假梗要大覺瞓, 老公知我晚上煲劇, 今早都唔敢叫醒我, 做大懶豬到11點半先瞓夠, 再到聯和墟飲茶, 飲完茶又係圖書館睇書, 中途契女媽搵我原來佢同契女又係圖書館, 真係約都冇咁啱, 契女見到我好開心. 今日只買一條紅蘿蔔同兩條臘肉, 因屋企有芋頭, 有我近期至愛既栗米,去完圖書館之後都蒸兩條栗米做下午茶, 晚餐芋頭炆雙臘(臘鴨加臘肉), 再煲粟米紅蘿蔔虫草花湯, 飲完大碗湯真係覺得好滋潤架!

妹妹溫馨提示: 今晚落雨天氣真係涼好多呀! 記住保暖唔好凍親呀!

越大越乖

妹妹: 喵! 今日真係好開心呀!
我    : 妳日日都開心架啦! 食飽就玩, 玩飽就瞓!
妹妹: 唔係呢D開心呀!
我    : 咁有咩咁值得開心呀!
妹妹: 今日妳呀大同呀妹都讚我越大越乖呀!
我    : 係咩!
妹妹: 係呀! 因為我任佢地摸仲反肚肚添呀!
我    : 咁又真係抵讚既!

昨晚呀大呀妹同佢男友來雙打, 打麻雀兼打邊爐. 妹妹今次完全唔怕佢地, 係廳行來行去, 仲瞓上床俾呀大同呀妹任摸, 之後仲反肚肚扮friend, 呀大話佢仲錫佢咀咀兩次. 真係越大越乖好抵錫.

呢張未經我同意就用我張玉照扮生日卡送俾契女呀媽, 不過都影我我幾靚既!

天氣開始凍, 最好梗係攬實或捐入被被瞓啦!

 妳一個人食飯咁慘, 又等我陪下妳啦!

今晚得一碗雲吞咁小既!

今餐就唔同啦! 咁豐富有湯有芋頭炆腩肉. 用新煲炆真係零舍不同!

呢盒吉x家外賣好似好好味咁喎!

點解每逢星期日一定係食麵麵架! 悶!

今早就唔同呢! 食手打烏冬仲好啦!

大家早前有冇行鬆榚呀! 個十日真係忙到飛起, 最後一日同班同事食宵夜慶功. 雖然係辛苦, 但一班人合作十日都好開心既!

因返工時間太趕唔會選擇到茶樓, 所以一放假都好恨飲茶, 同朋友傾下講下最開心! 好友既兩位孫女越大越可愛呀!

早前買既LC昨晚大派用場, 老公幫手砌cake stand時一路話, 呢套嘢唔平喎, 我就話你都幾識貨喎, 佢又話梗係啦, 我都見過呢個牌子, 不過又真係好靚. 我話今晚打邊爐用, 佢好奇怪問唔係放蛋榚咩? 到開餐時一拎出來, 個個都話個stand好靚呢!

擺上網

妹妹: 妳最近又試忙到抽筋咁喎!
我    : 妳點知呀!
妹妹: 緊係啦! 最近都唔見妳煮飯仔就知啦!
我    : 日日由朝做到晚邊有時間呀!
妹妹: 係啦! 連擺我上網都冇時間!
我    : 咁我真係好忙呀嗎!
妹妹: 妳知唔知好多人會掛住我架!
我    : 知啦! 知啦! 依家咪擺緊妳上網囉!

真係有20日冇見大家呢! 因最近成日要加班呀! 日日早出晚歸, 晚晚返到屋企都成11點幾. 真係冇心機坐係度慢慢上網, 不如早d瞓上床煲下劇休下息好過呢! 大家掛住妹妹, 咁就去片睇下相止下渴先啦!

                                                                        妹妹心聲:

今晚又冇飯開?

 

成日食呢D做早餐唔悶既咩? 

 

今晚有咸豬手都好DD! 

 

焗咁多個一定又係送禮啦! 

 

今晚有湯有魚又有菜真係正! 

 

等我陪下妳食早餐啦!

 

咁衰開飯都唔叫我! 

 

嘩! 有燒鴨喎! 真係要飲返杯先得! 

 

我咁香都唔駛噴香水啦! 

銀袋日跟一班朋友入埸, 今年入場送既襟針都幾靚架! 因朋友有好多入場票, 我都唔執輸行四轉, 四個襟針三姐妹一人一個, 另一個當然係送俾契女媽媽啦!

下午入完場順道約呀大去呀妹屋企坐下, 之後行城門谷公園, 公園環境好靚好舒服. 呀妹男友請食晚飯, 因係多謝呢~

有時一個人下午茶再加件餅都好享受架!

 

某星期六同老公跑步到大埔, 其實係快步行多過跑, 沿途風景真係好靚架!

好想食中式包, 上網揾下資料見材料同方法幾簡單, 拿拿聲開工照做, 第一次整蔥花卷, 估唔到相當成功, 同事同老公都讚好軟熟好好味. 過兩日跟住encore做菜肉包, 餡料有椰菜, 免冶豬肉, 冬菇, 送五個俾契女食, 契女爸爸食飽晚飯, 但居然食完一個又一個, 跟住再一個, 前後共三個, 契女媽即時雪起最後兩個, 唔係一定冇份食. 每次我都好鐘意將食物同佢地分享, 因佢地一家一定好俾面, 成日讚我整得好好食, 所以真係好開心架!

 

 

契女媽20號生日, 早幾日提前同佢預先慶祝, 上圖其中粉紅色公仔香水就係我送俾佢既禮物,

因自己都好鐘意, 所以就買多一支黑色公仔俾自己.

再祝契女媽生日快樂! 身體健康! 一家人幸福快樂!

吹蠟燭

妹妹: 嘩! 好嘢! 有蛋榚食!
我    : 唔好搞呀! 唔係俾妳架!
妹妹: 我都知妳冇咁好會買俾我啦!
我    : 個蛋榚係慶祝妳老豆生日架!
妹妹: 老豆即係咩呀! 一粒好老既豆呀?
我    : 唔係呀! 老豆即係爸爸囉!
妹妹: 咁快d叫佢吹蠟燭, 可以快d食蛋榚啦!
我    : 咁妳陪佢一齊吹啦!

昨日係老公農歷生日亦係萬聖節, 專誠買個蛋榚賀一賀佢, 祝老公生日快樂! 最重要係身體健康!

妹妹俾老公捉實個樣好搞笑, 好似係到諗點解唔係得佢一個做模特兒, 唔通俾人搶飯碗?

生日飯好豐富架! 生菜包, 生魚窩, 白灼鵝腸, ＢＢ鴿,  再加一支大啤.

最近發覺妹妹有口臭, 發現其中一隻大牙有發炎紅腫, 25號帶妹妹到獸醫檢查, 靚女醫生話妹妹有牙石問題, 要做麻醉洗牙同剝牙. 醫生讚妹妹好乖, 當然仲有話佢都算肥嘟嘟, 大家估下妹妹有幾kg呀! 開估...原來有5.2呀!

第二朝妹妹成個貓樣仲係謝謝地, 平時會喵喵叫早晨, 成日都冇出過聲, 再加上要連續食5日抗生素, 食到佢都怕怕, 不過妹妹又真係好乖好合作, 食完藥只要俾兩粒零食佢, 佢又會好開心架啦!

大家睇下, 我洗完牙係咪好靚好白呀! 係咪可以賣牙膏廣告呢!

有日睇都市閒情整水煮肉, 我又學整不過改用田鷄同改小辣, 估唔到效果唔錯, 連老公都讚好食!

以下冬茹栗子炆鴨同菜心係老公煮, 味道都唔錯架!

27號到K11跟Jacky學烹飪, 今次用高速煲煮南瓜大蝦湯同蒸臘味飯, 桂花酒釀小丸子. 當日隻手唔小心俾高速煲辣傷, 真係好痛呀! 依家好擔心會有疤痕呀! 嗚.......

昨日一早同成班朋友仔共八人飲早茶,  人多飲茶真係特別開心, 因可以叫好多款點心, 樣樣都好好味呀!

早前係尖東見人拖隻豹貓行公園, 佢真係好大隻好靚仔呀!

呢位小朋友都係男仔, 依家三個月大係咪瞓得好有型好可愛呀!