病貓

好耐冇見大家啦! 因為真係好忙呀! 早兩星期連續返工14日冇休過息呀! 原本昨日都要返工, 但妹妹唔舒服, 所以臨時請假要陪妹妹睇醫生呀! 話說前晚食晚飯, 妹妹又習慣性跳上椅睇我地食咩, 老公突然話點解妹妹條頸咁腫既, 我仲話唔係, 佢肥就真, 但再望真d, 真係見到左頸腫腫地, 摸下仲感覺似粒波子咁大. 到第二日又打8號風唔可以一早掛號睇醫生, 終於下午1點先有人聽電話, 約下午4點睇, 靚女醫生同佢探熱, 檢查都好乖, 之後話有三個可能性, 淋巴炎, 囊腫同腫瘤, 要用針抽, 如果有血水, 發炎就多數係第一二, 如果抽唔到任何嘢, 就多數係腫瘤. 好彩醫生同佢抽到紅紅地色既液體, 即時打一支抗生素針, 今日開始要連食7日抗生素藥. 醫生同姑娘個個都讚妹妹好乖, 完全冇反抗, 喵都冇喵一聲, 仲乖過好多狗狗, 讚佢good girl同excellent呀! 貓貓們有事真係好擔心呢!

 昨日坐的士時都算乖, 只係喵咗幾聲, 可能佢喉嚨腫咗所以唔亂叫啦!

今年中秋學人玩下冰皮月餅, 自己整粟子同芋蓉兩款口味. 第一次整都算ok啦! 自己覺得唔夠幼滑, 但呀妹同朋友仔們就讚好好食, 好有口感喎! 佢地認真俾面就真.

呢餐中秋節餐中西合壁, 有白汁松露同蕃茄意大利粉, 炸鶢翼, 羊扒, 和牛, 鮑魚冬茹煲, 糖醋蝦, 飯後甜品芝士豆腐蛋糕,  呀妹男友又提供靚紅酒, 係咪好豐富呢!

呢碗冬瓜盅相粒磨茹相笑得好開心, 真係好可愛呀!

原來想送部手機俾老公做生日禮物, 點知反而老公睇唔啱心水唔肯換, 仲叫我換部大d, 不過大d煲劇又真係清好多呢!

呀大成日讚盒裝喇沙麵好好食, 上次送三盒俾我, 呢盒咖哩味又真係唔錯.

咁耐冇見妹妹, 送多兩張大家欣賞.

昨晚同今晚既晚餐, 妹妹昨日睇完醫生打咗針, 掛住瞓覺覺都唔陪我地食飯, 到宵夜食糖水時先肯應酬下俾我影相, 到今晚心情好d肯陪我地食飯啦!

樣衰衰

妹妹: 喵~ 我準備瞓覺覺豬啦! 妳仲影咩呀!
我    : 影底妳個衰樣呀!
妹妹: 我個樣一d都唔衰架!
我    : 咁仲話唔衰, 想偷偷地入被瞓!
妹妹: 鬼叫妳開到個冷氣咁大咩! 冷得我滕滕震呀!
我    : 妳咁多毛毛都唔怕凍啦!
妹妹: 咁人地鍾意張被被吖嗎!
我    : 咁即係唔怕凍啦...

又試好耐唔見大家啦! 最近好多人都話妹妹肥咗, 咁大家幫下眼睇下係唔係啦!

圖1~呢張準備攬實被被瞓覺豬相, 個肚成個波波咁!

圖2~四腳朝天呢張又好似冇咁肥!

圖3~上次個箱太細, 根本冇法轉身, 今次轉個靚箱都係唔係好夠瞓!

唔好話妹妹肥咗! 我自己知自己事, 最近真係肥咗巧多呀! 主要原因係食得太多, 個胃越食越大唔肥就怪啦! 另外又小咗行圈, 呢兩個星期開始一放假都會去行下, 今日老公放工都陪佢一齊行咗三公里有多架! 肥得有道理既証據如下:

焗咁大個香蕉蛋榚

兩人食咁多件壽司?

大大件和牛扒!

呢餐正常d, 梅菜肉餅係契女媽整既. 皮旦芫茜魚片湯, 菜心.

羅宋湯加牛腩煲係好飲又好食, 但都幾肥呢!

飲淨咁多羅宋湯, 再加燒鶢pizza咪肥加肥囉!

原本蒸魚同草菇生菜算, 但睇完吾淑吾食教整炆五花腩, 不過都係炆定第日食既!

冬瓜魚湯加肉餅都正常既!

炒麵加菜乾粥, 都唔係好肥呀?

13號係契女生日, 12號又到舊年尖沙咀Town gas食半自助餐. 今年特別開心有呀妹同呀大一齊慶祝, 契女今年收到好多禮物, 呀大封大利是, 呀妹就送10件精品, 件件契女都好鐘意, 不過要數第一位最鐘意既禮物, 契女好識做話梗係契媽個份, 大家睇到佢頭上戴住個蝦蟆kitty吊咀嗎? 午餐後成班又柴娃娃睇馴龍記2, 晚餐同呀大係加拿大回港既好友一齊食. 到13號正日, 契女又邀請我同契爺上佢屋企開大食會慶祝. 連續兩日都過得超開心呢!

今日開始連放8日假, 一於利用呢幾日唔好食咁多, 日日都外出多d運動. 大家等我下次報告有冇減返小小啦!

小花13歲生日

妹妹: 我好嬲嬲呀!
我    : 又做咩事呀!
妹妹: 妳做錯嘢都唔知!
我    : 妳唔講我點知呀!
妹妹: 妳淨係記得小花生日, 唔記得我生日呀!
我    : 係喎! 又真係唔記得咗喎!
妹妹: 咁快d諗下點樣同我補祝生日啦!
我    : 一陣開罐罐俾妳食補數啦!

話咁快小花又大一歲啦! 今年6月30日就係小花13歲生日. 希望小花健健康康, 開開心心!

妹妹原來都已經三歲啦! 不過4月份完全唔記得同妹妹慶祝呢! 睇下妹妹學契女擺個淑女pose, 同橙橙, 花花草草同紙箱影相, 係咪都幾靚女呢!

朋友介紹呢隻包包唔錯, 所以又買兩包玩下, 效果又真係唔錯.

最近妹妹好懶, 成日坐定定係地, 唔係好鐘意做御用開飯model. 老公話佢好醒, 知我一拎起手機想影相, 佢走避開鏡頭唔肯影. 所以大家睇住遠鏡妹妹先.

大家都知我成日講我係好鐘意食魚魚, 今日睇返相, 發覺十張有九張都係食魚, 唔信! 大家一齊睇下啦!

呢份係吞拿魚治, 都係魚呀!

外賣都要買三文魚頭.

就算一人晚餐都心思思煎小小三文魚骨腩食架!

今次又傾住咁多先, 下次再見~~

熱辣辣

妹妹: 這晚我熱辣辣. Yeah~

我    : 妳咁叻識唱呢隻歌既

妹妹: 唔只呢隻架! 我 d 熱情, 好像一把火! 燃燒了整個沙漠...

我    : 犀利喎! 仲有冇呀!

妹妹: 熱咖啡! 為你斟! 為你....

我    : 仲有呢!

妹妹: 妳估我賣唱咩! 我提妳咁熱, 好快d開冷氣呀!

我    : ........

哈哈哈! 妹妹係咪好醒呀! 呢幾日真係熱到飛起, 日日好早就要開冷氣啦! 早前鬆糕感謝節同一塊田大減價, 大家有冇去掃貨呀? 我就連續返鬆榚六日再幫一塊田五日, 足足忙足11日, 呢幾日可以休返幾日息, 真係爽呀!

原來契女同我一樣都鐘意食乳鴿, 每人一隻食完真係超滿足! 

第一次係太古呢間飲茶, 可能有新鮮感, 款款都覺得唔錯幾好味架!

母親節應承呀大囡囡, 幫佢買蛋榚同食飯慶祝, 有靚靚羊扒同牛扒, 仲有呀大煲既花膠響螺湯.

最近榴槤當造, 成日都忍唔住買, 每次都係自己食晒, 食完又熱氣, 所以打返杯沙冰解下熱都唔錯.

呀大好開心打電話話中咗六合彩, 等我鬼死咁開心以為中好多, 原來係中六百幾元, 不過有得中都好叻叻, 所以呀大約大家昨晚食晚飯慶祝!

盒士多啤梨又大粒又甜, 連妹妹見到紅卜卜都覺得好靚!

 又係簡單既一餐, 菜乾粥配粉卷同鷄包仔.

同契女媽每人買一大條牛脷, 跟足肥媽巴方法整, 先用高速30分鐘, 再 加配菜炆.

大家有冇睇來自星星的你呢! 妹妹都扮下貓星人跟下潮流先得!

每次換被套或床單, 都一定有佢份幫手....攪亂檔.

27號放假, 同契女媽食早餐再一齊買菜, 太耐冇住家飯食又特別掛住魚魚, 所以就蒸黃骨魚同魚香茄子.

 28號放假, 同妹妹洗白白, 洗完係咪白雪雪呢?

29號夜假早餐, 豬柳蛋麵配咖啡.

30號即係今日都係放假, 無無聊聊去聯和墟午餐, 之後去上水, 見芒果靚屋企有材料, 一於開工整下布甸, 明白可以派街坊啦!