網頁

2013年9月26日 星期四

唔開心

妹妹: 妳呢幾日個樣咁唔開心咁既!
我    : 因呀妹早兩日唔舒服入咗院呀!
妹妹: 係呀! 唔怪之得啦! 上次我唔舒服妳都係咁呀!
我    : 妳上次有唔舒服咩!
妹妹: 有呀! 妳帶我睇獸醫個次呀!
我    : 妳都唔係病, 係要剝牙呀!
妹妹: 咁妳呀妹做咩睇獸醫呀!
我    : 佢唔係睇獸醫係睇專科.....


月中同呀妹慶祝生日, 焗兩個佢同呀大最鐘意食既雪芳, 再加個手袋送俾呀妹. 生日飯係荃灣食上海菜.  今個星期一呀妹唔舒服入急症, 經過兩日檢查應該係心肌發炎或梗塞, 今日下午轉到心臟專科, 希望呀妹乖乖養病可以盡快康復呀!



陪食篇:
早前到大埔食燒鵝瀨, 對住個靚靚熱帶魚魚缸, 有魚魚陪食真係食得零舍開心架!

不過買外賣返屋企食都一樣咁開心, 因有可愛妹妹陪食!

上星期同呀大係銅鑼灣食豬膶麵, 又有咁得意既汪汪陪食, 佢晚晚都會陪主人開工, 真係好乖好可愛架!

打風篇:
早餐由老公負責. 大家睇下妹妹個為食樣, 但佢只係聞下八掛下, 並唔係真係想食, 係咪好奇怪呢!

最搞笑明知下午會打八號風, 老公居然叫我同佢出九龍買手機, 其實佢睇中我部, 想我換機將我部俾佢用, 所以順道係九龍買菜, 晚餐就由我出馬, 有莞茜皮旦魚片湯, 冬茹炆鷄, 菜心.

天兔走得快好世界, 唔係班流浪既小朋友就好可憐, 如果我唔收養妹妹, 妹妹既下場都係流浪貓, 所以等妹妹扮下可愛既小白兔俾大家欣賞下仲好啦!

我部係打風日買既新手機又真係唔錯, 真係多謝晒老公呢! 不過妹妹個樣好似有D呷醋咁!

2013年9月16日 星期一

一頭煙

妹妹:  喵! 快D過黎啦!
我    : 做咩喵得咁緊張呀!
妹妹: 天花上面有隻怪物呀!
我    : 吓! 唔係掛!
妹妹: 係呀! 佢個樣好樣衰架!
我    : 哦! 原來係鹽蛇!
妹妹: 快D幫我捉住佢俾我玩呀!
我    : 我依家搞個blog一頭煙啦! 妳自己捉飽佢啦!


早幾晚半夜三更聽到妹妹貓殺咁嘈, 原來發現天花板上面有隻粉紅色既bb鹽蛇, 老公又瞓到隻豬咁, 惟有頂硬上用掃把掃佢落地, 但佢跑得九秒九咁快, 我同妹妹兩個都捉唔到佢. 妹妹個晚成晚冇瞓, 好唔忿氣捉佢唔到呢!


最近返新環境工作, 重新認識一班新同事, 放工同兩位同事到大排檔食宵夜.

樓上好友又煲愛心靚湯俾我飲, 今次係鮮鮑魚烏鷄湯, 真係好味到冇得頂呀!

放工冇飯食, 最開心就係食包包啦! 腿蛋冶加鮮奶做晚餐係咪好似早餐呢!

12號放假晚餐煮金銀蛋莧菜, 梅菜炆花腩, 用高速煲煲白果腐竹糖水真係快靚正! 大家都試下啦!


好友送兩大隻日本溫室水蜜桃, 真係又甜又多汁呀! 盒曲奇係朋友係上環排隊幫我買, 一盒要180又真係幾貴呢! 不過個盒好靚d曲奇都好好食既!

2013年9月8日 星期日

契女家開飯


妹妹: 妳呢幾日成日陪電腦多過陪我喎!
我    : 鬼叫丫烏咩!
妹妹: 丫烏我都好驚呀!
我    : 係電腦既丫烏呀! 佢遲d摺埋唔做呀!
妹妹: 咩咁麻煩架!
我    : 係囉! 所以又要重新學過呀!
妹妹: 咁妳咁蠢咪有排學!
我    : 妳咁叻妳幫我整啦......


一收到丫烏要摺埋既消息, 真係唔開心咗幾日呀! 惟有盡快搵契女大哥哥幫手整備份啦! 依家新環境未熟, 要重新學習呀! 早幾日上契女屋企搞電腦備份, 專登焗兩底蛋榚, 契女媽, 契女同二哥哥哥每人食三大件, 仲話好鐘意食, 真係超級俾面啦! 另外再買半邊鵝同叉燒, 契女媽負責炒菜同煮飯, 真係要唔該晒大哥哥幫手呀!


上圖尖椒同呢碗節瓜粉絲蝦米係老公負責煮架! 下圖碗日本南瓜加蕃薯糖水就梗係我整架啦! 最近對住部腦係咁研究, 對眼真係近視加深唔小呀! 今晚都係唔好對咁耐, 要早D休息呀!

2013年9月5日 星期四

放假煮飯仔

今日放假, 原本呀妹生日約今晚食飯慶祝, 但因佢大感冒, 所以行程取消! 不過都祝呀妹
農曆生日快樂! 身體健康! 
唔駛出街, 最好節目梗係煮下飯仔啦! 等妹妹同大家介紹一下今晚食咩先. 
妹妹: 嘩! 今晚好豐富喎! 有什菜湯, 滷水鷄腎, 薑蔥蠔