網頁

2013年10月24日 星期四

叉一叉

妹妹: 呢條係咩東東呀!
我    : 唔好搞啦! 用來叉電架!
妹妹: 點解要叉電呀!
我    : 部電話冇電時咪要叉囉!
妹妹: 咁我都冇咩電啦! 借俾我叉一叉啦!
我    : 妳又冇電咩!
妹妹: 係呀! 妳又唔俾嘢我食, 我梗係冇電啦!
我    : 咁妳自己叉飽d啦!
 


大家好嗎? 最近比較忙所以冇咩時間寫blog呢! 早幾日電視又做關于雀雀既節目, 妹妹好認真咁睇足半個鐘, 今次好乖完全冇用手仔搞電視, 個樣真係好搞笑架!


13號係呀大既正日生日, 呀大同呀妹下午到屋企打雀雀, 妹妹今次好乖好大胆係廳行來行去, 仲俾佢地任摸. 晚飯就係一早預訂既稻x皇席宴, 食完飯再返屋企唱生日歌同切蛋榚.


 早幾日開飯, 妹妹完全冇興趣, 可能佢聞到係咸魚青菜唔吸引, 所以要罷工唔肯做貓模俾我影呢!

 呀大係Apita買盒麻辣薯粉俾我食, 估唔到味道真係唔錯, 妹妹都有興趣八一八啦!

一早起床發覺佢瞓係我隔離, 呢張係咪影得佢幾靚女呢!

同事們訂一蘿大閘蟹, 我都唔執輸要6隻食下, 以28元一隻都算唔錯, 同老公每人食3隻又真係幾漏架!

昨晚同事共五人一齊食一蘭, 同事提早排隊都排成35分鐘以上, 我呢碗加蛋同木耳找數要三條一, 真係好貴呀!

今日放假, 下午接契女放學食下午茶, 食完買青紅蘿蔔煲臘鴨腎湯, 冰櫃有包急凍帶子, 用牛油蒜蓉煎一煎已經好香呢!

2013年10月12日 星期六

眼超超

妹妹: 妳成日都影我唔悶既咩!
我    : 唔悶呀!
妹妹: 我想話妳唔悶我都悶呀!
我    : 唔怪得妳眼超超咁啤住我啦! 原來嫌我煩!
妹妹: 人地瞓得好地地又叫醒人影相!
我    : 邊個叫妳咁可愛呀! 所以我先影妳之嘛~
妹妹: 咁唔該妳影快d啦!
我    : 妳依家真係越來越把之閉....

黃金周終於完結真係太好啦! 之前無論搭車, 行街, 返工, 食飯, 買嘢, 甚至屋企樓下大排長龍拎入學申請表....... 通街都係強人, 認真誇張呀!

 
老公煮食篇:
煲生菜鯪魚球粥, 放工有妹妹陪我食夜粥.

腸仔煎蛋配咖啡做早餐.

咖喱薯仔鷄翼, 老公夠晒創新, 煮咖喱加蕃茄, 但煮出來味道都幾特別. 所以妹妹都聞得好投入覺得好香咁喎!

1至11號只得8號放假一日, 太耐冇見契女真係好掛住佢. 所以上午係上水做完面, 買下嘢, 下午焗批牛油蛋榚仔同係上水買隻文昌鷄俾契女食, 原先契女媽話整生炒骨叫我上佢屋企食, 但佢突然有事煮唔到飯, 所以上契女屋企一陣, 最後係我屋企樓下餐廳食, 契女媽好客氣叫好多食物仲爭住請客.

 
 
昨日食午餐行過Pepper Lunch, 見好多人幫襯又聞到香噴噴, 第一次食味道都唔錯, 因好鐘意食佢既配菜夠多, 今次食鷄扒, 下次想食三文魚味.
 
 


 今日同明日都放假, 老公昨晚話叫我請佢飲茶, 瞓到10點半就出發去上水飲早茶, 之後到圖書館, 因冷氣開到好似雪房咁, 所以只係打一陣書釘就去跑步. 老公一口氣跑十個圈, 而我因太耐冇運動, 要分兩次跑六個圈. 做完運動出身汗又真係好舒服, 成身爽晒!

昨晚都係老公煮飯仔, 鯪魚餅炒洋蔥絲瓜. 放工煲花生麥米黑糯米, 妹妹陪住食宵夜真係好乖架!

上次買兩隻鷄一隻送俾契女 , 一隻打入冷宮; 今日放假一於食鷄, 炒菜心再加冷飯又一餐. 依家煮飯仔時間越來越小, 就快要改名做老公煮飯仔啦! 哈...哈...哈!

明日係重陽節又係我大家姐既正日生日, 祝呀大生日快樂! 身體健康! 每一日開開心心!

2013年10月5日 星期六

山貓

妹妹: 嘩! 好靚仔呀!
我    : 邊樹有靚仔呀!
妹妹: 咪電視入面囉!
我    : 隻山貓又真係好靚喎!
妹妹: 咁佢靚定我靚呀!
我    : 各有各靚啦!
妹妹: 佢係靚仔我係靚女!
我    : 妳話係就係啦.....

星期日早上大家有冇睇山貓呀! 妹妹見到有動物睇, 仲要係咁靚既同類, 全程坐定定係電視前睇得十分投入, 仲伸手仔好似想叫山貓同佢一齊玩, 個樣真係好搞笑.


妹妹一開心就會係梳化反轉再轉狂打筋斗, 見到佢食得, 瞓得, 玩得咁開心我見到到會好開心呢!

碟豬扒蛋係咪煎得唔錯呢? 不過唔係我煮係老公煮架. 妹妹眼定定望住塊豬扒好想食咁樣!
 
 最近成日要返中班多, 所以冇晒時間煮飯仔, 某日突然好想食南瓜炆鷄, 買好半個日本南瓜同半隻鷄, 放工返到屋企已經夜晚十點半, 老公問妳咁夜仲煮咩東東, 我話你唔好理我啦! 煮完食三件南瓜就好開心咁瞓覺豬, 其它分兩份一份帶飯盒, 一份留俾老公食.
 

家姐位小學同學話請我食飯, 仲送好多對襪同貓糧俾我, 真係又食又拎多謝晒呀!
 

上星期四放假一早到街市買料煲湯同蒸飯到醫院探呀妹. 下午就約咗做facial, 原本專誠搭車到上水準備買魚買菜, 但真係好倦唔想煮, 所以又係出街食.

行街街見餓餓地, 食份輕便茶餐都唔錯架!

昨晚可以放早, 約呀大同呀妹食豬膶牛肉麵, 再加碟花枝帶子西蘭花.  呀妹要戒口所以只係食清湯豬膶牛肉米粉同菜.


上一篇多謝各位關心呀妹病情, 原來佢係急性甲狀線, 所以影響心臟同有腳腫問題, 係十日內瘦咗18磅, 昨晚見佢真係瘦咗好多, 依家已經轉介睇專科, 有藥食同注意飲食後已經好返好多. 真係好多謝大家既祝福呀!!!