恭喜發財!

妹妹: 恭喜發財! 龍馬精神! 身體健康! 出入平安!
我    : 今年咁抵錫, 知道要同大家拜年!
妹妹: 梗係啦! 因為我越大越乖吖嗎!
我    : 咁乖就獎勵下妳啦!
妹妹: 我知啦! 妳準備開鮑魚罐罐獎我啦!
我    : 妳就想啦! 我買俾自己嘆架!
妹妹: 咁我有咩獎呀!
我    : 獎妳食兩粒芝士零食啦!

首先祝賀大家: 恭喜發財! 新年進步! 萬事如意! 身體健康!

唔經唔覺有成大半個月都冇寫網誌, 自己都唔係幾好意思! 但年底工作真係超忙, 大家掛住妹妹唔好見怪呀! 依家去相睇下妹妹近況先.

                                          

年三十晚要工作至十二點, 老公專程接放工然後到上水行花市, 花市接近收市所以拿拿聲買兩盆蘭花, 返到屋企同佢扮靚靚, 包下禮物又包下利是, 到半夜四點先瞓覺覺.

初一都要返工, 老公又接放工外出晚膳.

包利是期間妹妹當然會搞搞震, 好似提我未封大利是俾佢同小花.

原本應該年二十八洗邋遢, 但當日太忙所以到年三十見天氣唔係太凍, 幫妹妹洗白白過新年. 今次冇同小花洗, 因老公話佢年紀大怕凍親佢, 所以小花冇份洗. 洗完白白係係好靚女呢!

樓上住好友好叻叻, 親手織一對福字掛飾, 利是封摺既紙扇, 真係好有新年氣氛呀!

係一田買一對大桔, 真係好大對好可愛架!

契女媽煲大大煲姜醋, 送一大碗俾我食, 原來加咸蛋煲真係好好味呀!

無論係食三文治, 飲汽水, 整包包,去洗手間, 瞓覺覺...... 妹妹都一定會搵個靚位望住或陪住我, 問心個句佢又真係好抵鍚架!